سالفة العراق مثل سالفة ام جبار الله يرحمها
واحد يگول امي تخربطت بالليل
وماعندي سياره أوديها للمستشفى فـ خابرت ولد جيراننا الاثول لأن عنده تكسي
گتله فلان تعال هسه عندي حاله طارئه..
گال:منو إنته؟؟
گتله:جبار جيرانكم..
گلي:ياجبار المطيرچي؟؟
گتله:لا جبار جيرانكم الواركم..
گلي:جبار أبو المولده؟؟
گتله:لا يمعود جبار الوراكم حايط عل الحايط..
گال:هاااا..جبار أبو گذله؟!
گتله:إي أبو قندره
گال:خير..شعندك؟؟
گتله:الحجيه تخربطت بس تعال نوديها للمستشفى بسرعه..
گلي:يامستشفى؟؟
گتله: المستشفى العام
گلي:ليش مو الاهلي؟؟
گتله:هسه وين ماچان بس خلصني تعال..
گلي:أحد وياك لو بس الحجيه؟؟
گتله:هو بس آني وياها بالبيت قابل أجيب البزازين ويانه؟! رحمه لأهلك بس تعال..
گال:أبدل ملابسي لو أجي بالتراكسوت؟؟
گتله:أدري رايحين خطابه البس أي شي ..
گلي:شوكت تريدني أجي ؟؟
گتله:تعال يوم الثالث الحجيه ماتت
خرب صفحة أهلك
رباط سالفتنا!!!
صار ٢٢ سنه الشعب يصرخ انهبنا انبكنا الفساد وصل لبو موزة!!!!!
ويطلع المسؤل وهم يصيح الفساد مستشري في كل مفاصل الدولة سوف نقضي على الفساد وحيتانه وعلى هل الرنة صار ٢٢ سنة لا شفنا واحد جبير نسجن
وشعب من الصبح لليل بس يشتم ويسولف بالفساد والسرقات مرحبا ويرجع ينتخب نفس الوجوة ويقتنع بنفس الوعود السابقة
((وعلى الرنة وطحينج ناعم))
والله يرحمك ياعراق!!!!!
