سالفه ورباط…
حجي جبار عمره (51 ) سنة…
خلص حياته مع زوجته بهية بالأه والحسره والحرمان..
لان بهية امرأة متمارضه .. و 24 ساعة تتبطح بالحوش ..
وتشبگ بالدواشگ والمخاديد!..
ومن يسألها شبيج ولج بهية ؟
تجاوبه والله كلياتي يوجعني !
شبيج يمعودة؟
والله معدتي موتتني !
شبيچ لخاطر الله ؟
والله گلبي ايشچني !
شبيچ يبعد ارويحتي ؟
والله مفاصلي سايفات!!
مل وجزعت روحه منها … لان يحس روحه مزوج مستشفى بكل شعبها .. شعبة الكسور .. والباطنية .. والجملة العصبية ..
ما مزوجله مرة مثل الاوادم ..
22 سنه على هذه الحاله من .. المعاناة . والكبت.. والحرمان .. للحاج جبار .. حتى شحب وجهه من شدة الحرمان وارتفعت في جسمه هرمون التستيرون…
ابنه حسين حيل يحب ابوه ومتعاطف مع قضيته الزوجية ويشعر بحرمان والده العاطفي ..
فد يوم قال لوالده بوية متخليني ازوجك ؟
صفن جبار بوجه ابنه وقال له .. والله بوية علواه .. جميل ما انساه الك مدى حياتي واول طفل الله يرزقني بي اسميه على اسمك !؟
صدگ ما هي الا ايام حتى جلب له امرأة اربعينية .. تتگهمز اتگهمز ..
وبيضه چنها العيد وكلها حيل ونشاط .
فرح جبار وگام ياخذ دقلات وجمبقلات ورجع كأنه شاب عشريني!!!
انصدمت بهية لهول المصيبة ..
وثاني يوم استيقظ جبار بصباحية العرس ووجهه يشع نور ومتفائل ومقبل عالحياة اخذ دوش الهنا وطلع من الحمام وهنا وقعت الكارثة !!!!!
وجد بهية ليست ببهية .. بل انها تشع بهاءاً لا .. بل وجدها حسناء كانها بنت وهبي في فلم حلاة روح ..
لابسة تراك احمر ..
ومسويه حواجبها تاااتو ..
وصابغة شعرها بلاتيني على اشگر ..
ومصبغة اضافرها ..
وداگه وشم على جتفها .. ووشم ثاني على رگبتها يحمل اسم جبار..
ومشغلة فيروز .. ودتندن معاها .. نسم علينا الهوى من مفرء الوادي ..
والكارثة تُدندن بلهجه بيروتية قح .. كأنها لبنانية الاصل والنشأه.. تقرب منها جبار ومازلت الصدمة مدوخته .. فرك عيونه بقوة .. وگرص صفحته اقوى خاف يطلع يحلم تلمس وتحسس زوجته العوبة والمتمارضه سابقا فوجدها هي والله انها هي بهية ..
فقالت له صباحك سكر حبيبي ..
لم ينبس ببنت شفاه ..
ردت وقالت له .. شوبكبك حبيبي ..
بعده مصدوم جبار ..
تئبر البي بدك تتروء ( تتريگ يعني)
ومازال جبار مصدم ..
تئبرني يا ألبي شوبك ..
نطق اخيرا وقال لها .. طاحظج وحظ ذاك الاب المابي حظ يابنت الطحال ..
ليه يا ألبي عم تحكي هيك ؟
ولج چا وين چنتي كل هاي السنين ؟
فقالت له .. اسفه يروحي لان عزبتك كل هيدي السنيين .. وهلا قررت اصلح حالي واعيشك احلى ايام عمرك يروح الروح انت ..
فقال لها .. بعديش ولچ لمن خلص عمري والحيل راح الحيل ..
لا والكارثه يرادالچن حيلين انت وشريچتچ ..
وراح الحيل الأولى!!!
رباط السالفه..
هسا حكومتنا صار سنين متمارضة ومن تقرب الانتخابات كلها تصيح عراق قوي غراق أمن بناء واعمار والمواطن ايصير شمعزة والمسؤول ينشاف بالشارع ويسلم على هذا وعلى ذاك اليوم ويروح للفاتحة وللعرس وبقية الايام جان محد يشوفة
ومن تكول عمي ابنوا عمروا يكولون ماكو فلوس _
وتاليها لحكوا على الفقير المتقاعد الي راتبة تفاليس وكل يوم مطلعين عذر يوم ماكو سيولة يوم خلل في أجهزة المصارف يوم الاشعار ماواصل
عمي من ساعة السودة الي شفنا بيها وجوهكَم !!!!!!
